Wargeyska Waxgarad War & Wacaal
La Xidhiidha
Nageeyoow abwaan buuxa oo loo bogaad tahaye
Barakaale boqoliyo haldoor beel hagaa tahaye
Isir bile bugtada dhaawacaa arar ku baan-baante
Han balaadhshe beeliyo qabiil bahiyo reer diide
Isku biirshe isku boogo dhaye wadajir boollayste
Budhcad mariye boga uumiyaha nabad ku baaqbaaqe
Ku boqraye banaadiriyo Xamar barada maan doojis
Bariidiyo salaamaha ku hano ciida barakaysan
Belo laga xijaabyoow tixdaad baahisaan helaye
Bogan waayay jiifkoo qalbigu way belbelayaaye
Balamaha qabyoobaa rajada beeniyo roga’e
Amaanada barriga iyo cirkiyo diide buuruhuye
Bani aadamkii qaaday yidhi waan ubaqayaaye
Alleylehe bad buu galay ninkii loo banaanbaxaye
Inkastuu Nin baariya yahoo laga burhaanaysto
Boqolaal ka hooseeya oo baabaa jira’e
Niman baadi-dhiciyaha gataa bayd lasoo degay
Himilada bidhaantay rabeen inay bakhtiiyaanne
In bulshadu nacdaa baa la rabay oo bilaahiye
Baraad li’i isana wawgu dhacay bohoshii dheerayd.
Siyaasiga bilaash xaytahee buunka tuma reerka
Baho qarana ciidaa kabadan calamo beeleysan
Intaasoo beliyo baasa iyo boqol kunoo jaana
Iyo diin kabeen kasheegatada uunka boqon gooyay
Iyo baad ku naax baa hantiyay beledkii Soomaal
Basaas iyo amxaar baa arlada baaba’shoo rogaye
Berberiyo Hargeysiyo Togdheer Booramiyo Awdal
Bandarbayla boosaaso luuq Bariyo Nuugaasha
Ku badbaadi waa geesigii buulashii Muduge
Wadnihiyo bu’dii wadajirkay bahalo jiifaan
Bulshayahay bah qudha baad tihiyo beelo wadayaale,
Cadow kuu bahoobaa jiroo baaba´aa raba’e
Naf kuwaad bidaysee usii baratamaysaani,
Waa bahaladii shalayto galab baabah kaa dhigaye ,
Badh ba maalin bay cunahayaan baaqigii hadhaye,
Intaad barakacaysee colaad buun utumanayso,
Birlabta iyo geesiga intaad boqonta goynayso ,
Miyaa calan bir laga taagayaa midab buluuglaa?
Ama ay dadkaygoow boogsoon boogta nagu taal?
Shimbirkaba haddii baal la jaro biibi kari waaye,
Lama jaro boqnaha ruux hadduu kuu gargaar-baxo’e,
Nin walaalkii beegsanahayaa waa bar kumataale
Goortii halyeygii bilnaa xabashku boobaayay
Isagoo birjeebada ku xidhan Goortii lala buubay
Baydhaba markii loola kacay Baayna lala aaday
Barqo Goortii laga duuliyee laga baqoolsiiyay
Raggii Xamar balwaynaayay ee bixiyay ee dhiibay
Taariikhda baal madaw ku qora baranay tiigtiiye
Rabbi baa badbaadshaha ah aan laga badbaadayne
Isagana baryada iyo ducada ugu bil roonaada.
Inagana waxay nala banaan beratan weeyaane
Hooy yaan wixii inaga ba’ay dani ubayhoofin
Waxa baaqigaaye nabdoon aynu badhi-taarno
Bulshooy wadajir baa lagu hantaa libin barwaaqaaye,
Biyihii dhaqaaqee socdaa riixi kara buure ,
Caqligii is wada biirsadaa guulo beegsada’e ,
Talo lagu bahooboo midaa lagu badhaadhaaye ,
Mar hadduu ra’yigu kaa banjaro waad bahdilantaaye,
Waa inaad dhulkiinii bishaan oo badh-qabataane,
Ubirmada dalkiinii ayaa baahi wayn qaba’e ,
Is baxnaansha isku biirsha talo guusha wada baafsha,
Hana kala baqooline bulshooy gees isugu baydha
